आलु फलाउन अब आलु रोप्न नपर्ने !

किसानलाई आलु फलाउनका लागि आलु नै रोप्नुपर्ने बाध्यता टरेको छ । राष्ट्रिय आलुबाली विकास तथा अनुसन्धान केन्द्र खुमलटार ललितपुरले आलु खेतीका लागि बियाँ तयार पारेपछि किसानलाई आलु फलाउन आलु नै रोप्नुपर्ने बाध्यता हटेको हो ।

अनुसन्धान केन्द्रले तयार पारेको आलुको वियाँबाट तयार पारेको आलुको विउ पहिलोपटक लमजुङमा भित्रिएको छ । जिल्ला कृषि विकास कार्यालय लमजुङले पहिलो पटक जिल्लामा बियाँबाट आलुखेती गर्नको लागि बियाँ ल्याएको हो ।
परम्परागत तरिकाले आलुको दानाबाट आलुखेती गदा आलुको उत्पादन घट्दै गएपछि बियाँबाट आलुखेती गर्नका लागि एकसय पोका बियाँ ल्याएको कृषि विकास कार्यालयले जनाएको छ । दुई सय रुपैयाँ पर्ने आलुको बिउलाई जिल्ला कृषि विकास कार्यालयले ५० प्रतिशत अनुदान अर्थात एक सय रुपैयाँमा किसानलाई बिक्रीवितरण शुरु गरेको छ ।
बियाँबाट आलुखेती बिस्तारका लागि वर्ण शंकर नामको आलुको बिउ लमजुङमा ल्याएको हो । बियाँबाट रोपिने आलुमा डढुवा रोगको प्रकोप कम हुने, बिउ अभावले आलुखेती हुन नसकेको ठाउँमा सजिलै खेती गर्न सकिने, पहिले भन्दा आलु खेती निकै सस्तो पर्ने, बीउको लागतमा कमी, ढुवानी र भण्डारण गर्न सजिलो हुने, बिउमा प्रयोग हुने आलु खानामा प्रयोग गर्न सकिने र बियाँको उपचार गर्नुपरेमा कम खर्च लाग्ने भएकाले बियाँबाट आलु उत्पादन बढ्ने जिल्ला कृषि विकास कार्यालय लमजुङका बागबानी विकास अधिकृत ज्ञानप्रसाद अधिकारीले बताउनु भयो ।

बियाँबाट आलुखेती गर्नका लागि बारीमा अग्लो ब्याड बनाएर आलुको बियाँ जमाउनुपर्ने अधिकारीले बताउनु भयो । बिरुवा उमार्नका लागि ब्याडको माटोलाई आवश्यकता अनुसार मसिनो बनाएर त्यसमा पाकेको कम्पोष्ट मल प्रति वर्गमिटरमा ४ देखि ५ किलोको दरले मिसाउनुपर्ने उनको भनाई छ । यसैगरी रासायनिक मलको हकमा डी.ए.पी २०, युरिया १० र म्युरेटअफ पोटास २० ग्राम प्रति वर्गकिलोमिटर र ब्याडको उपचारका लागि बियाँ छरिसकेपछि बेभिष्टिन धुलो २ ग्राम पानीमा मिसाएर सिँचाइ गर्नुपर्ने अधिकारीले बतोनु भयो । ब्याडमा जमाएको विरुवा २५ दिनमा तयार हुने उहाँले बताउनु भयो ।
बिरुवा रोप्ने समय भएपछि आलुको विरुवालाई अन्य बिरुवा जसरीनै रोप्नुपर्ने कृषि प्राविधिकले बताएका छन् । विरुवा रोप्दा बिरुवाको बीचमा केही दुरी राखेर रोपीएमा आलु उप्पादन राम्रो हुने प्राविधिकको भनाई छ । साथै सँगसँगै रोपिएका विरुवाबाट साना साना आलुका दाना निस्किएमा ती साना दानालाई पुनः बिउको रुपमा प्रयोग गर्न सकिन्छ । ५ ग्राम बियाँबाट एक रोपनी जग्गाको लागि चाहिने बिरुवा हुने अर्थात ४ हजार ५ सय वटा बिरुवा उत्पादन हुने जिल्ला कृषि विकास कार्यालयका बागबानी विकास अधिकृत अधिकारीले बताए ।
परम्परागत आलुखेती गर्न सजिलो भएपनि बढी बीउको आवश्यकता पर्ने, बीउमा लागेको कीरा नियन्त्रण गर्न निकै अप्ठेरो र खर्चिलो पनि हुने भएकाले पनि आलु उत्पादन पछिल्लो समय घट्न थालेको छ । लमजुङमा बिशेष गरी करापुटार, भोर्लेटार, रम्घा, धमिलिकुवा, बेसीशहर क्षेत्रलाई आलुको लागि पकेट क्षेत्रको रुपमा लिइन्छ ।स्रोत :उज्यालो अनलाइन

Labels: feature, समाचार