feature, नेपाली सिनेमा » सेक्सबिना पनि बाँच्न सकिन्छ भन्छिन् करिश्मा मानन्धर

प्रेमलाई कसरी परिभाषित गर्नुहुन्छ ?
प्रेम भनेको चाहेर हुने कुरा होइन । म तिमीलाई माया गर्छु भनेर हुने होइन, यो महसुस गर्ने चिज हो । मानिसहरू यसलाई माया गर्छु, उसलाई माया गर्छु भन्छन्, तर माया भन्ने कुरा देखाउन जरुरी छैन ।
जीवनमा प्रेम किन जरुरी छ ?
प्रेम गर्ने नै होइन, यो त आफसेआफ हुन्छ । जस्तो म मेरो कबु (छोरी कविता) लाई माया गर्छु । माया भन्ने कुरालाई रोक्नै सकिन्न, यो त भित्रैदेखि हुन्छ ।  जस्तो कि म कबुका लागि जे पनि छोड्न सक्छु । छोडेर आइसकेको अमेरिका उसैको लागि (कविता हाल अमेरिकामा छिन्) जाँदै छु ।
कुन उमेरमा गरिएको प्रेम सही हुन्छ ?
प्रेम यही उमेरमा गर्दा सही हुन्छ भन्ने कुरा मलाई थाहा छैन, तर यो सहज प्रक्रिया हो । उमेर पुगेपछि एउटा महिला र पुरुषबीच जुन प्रेम हुन्छ भनिन्छ, त्यो वास्तवमा प्रेमभन्दा पनि आकर्षण भएको हुन्छ । पछि गएर त्यो आकर्षण नै प्रेममा परिणत हुन्छ होला ।
तपाईंको जीवनमा प्रेम कतिपटक भयो ?
मेरो जीवनमा यतिपटक प्रेम भयो भनेर ठम्याउन म सक्दिनँ । किनभने प्रेम गर्ने होइन, आफैं उत्पन्न हुने कुरा हो। आकर्षणलाई प्रेम भनेर नाम दिन मिल्दैन ।
रोमान्स भनेको के हो ?
रोमान्स भनेको पनि आकर्षण मात्र हो । कुनै पनि कुरामा राम्रो सोचेर रमाइलो महसुस गरिरहेको हुन्छ भने त्यो नै रोमान्स हो । हामी रोमान्स केवल केटा र केटीबीचमा हुन्छ भन्ठान्छौं, तर रोमान्स त म्युजिक, डान्स जेबाट पनि पाउन सकिन्छ। अपोजिट सेक्समा हुने रोमान्स अथवा आकर्षणले अलि बढी महत्त्व राख्ला अर्कै कुरा हो ।
रोमान्सका लागि कस्तो ठाउँ र कुन समय ठीक हुन्छ ?
त्यो पनि थाहा छैन मलाई त । कसैलाई के चिजले रोमाञ्चित बनाउँछ भने कसैलाई के चिजले ? रोमान्स भनेकै कुनै कुरामा हुने उत्साह र रमाइलो हो । यो केबाट हुन्छ भन्ने कुरा मानिसमा भर पर्ने कुरा हो ।
रोमान्सको बाधक के हो ?
रोमान्सको बाधक त आफ्नै दिमाग हो । कुनै पनि काम कुरा गर्नका लागि तपाईं दिमागदेखि तयार हुनुुहुन्न भने त्यो नै बाधक बन्न पुग्छ । जे कुरामा मनैदेखि खुसी हुन सकिन्छ त्यसबाट मात्र रोमान्स हुन्छ । कसैलाई जबर्जस्ती रमाइलो गराएर त हुँदैन नि ।
रोमान्सबिनाको जीवन कस्तो होला ?


भनिरहनै पर्दैन निरस हुन्छ ।
 सेक्सको परिभाषा कसरी गर्नुहुन्छ ?
सबैले भन्छन् सेक्स खानाजस्तो हो । मेरो लागि भन्नुहुन्छ भने सेक्स खानाजस्तो होइन । खाना नखाई त मान्छे बाँच्नै सक्दैन, मर्छ । सेक्स नभई त मरिँदैन नि । मेरा लागि सेक्स भनेको प्रेम अभिव्यक्तिको अन्तिम बिन्दु हो । तर बेग्लैबेग्लै मान्छेको बेग्लै धारणा हुन सक्छ ।
बिहेअगाडिको सेक्सलाई के भन्नुहन्छ ?
हिन्दु कल्चरमा बिहेअगाडिको सेक्सलाई मान्यता दिइँदैन । आजकल म सोच्ने गर्छु त्यसको रिजन के रहेछ भने जबसम्म मानिस आफ्नै खुट्टामा उभिन सक्ने हुँदैन, बिहेअगाडिको सेक्समा इनसेक्योर फिल गर्छ । सायद सामाजिका विकृतिलाई बन्द गर्न पनि बिहेअगाडिको सेक्समाथि बन्देज लगाइएको हो। मानिस जबसम्म आफूलाई ह्यान्डल गर्न सक्षम हुन्न तबसम्म सेक्स गर्नुहुन्न । २० वर्षको उमेर पछाडिको मानिस हो भने उसको निजी जीवनको व्यक्तिगत कुरा हो । सेक्स रिलेसन उमेरको आवेगमा राख्नुभन्दा पनि आफ्नै खुट्टामा उभिन सक्ने भएपछि राख्नु उचित हुन्छ ।
दुईबीच मन मिले पनि बिहेअघिको सेक्स ठीक हुँदैन ?
मन मिले पनि इनडिपिडेन्ट नभई यो रिलेसन नराखेकै बेस हुन्छ । होइन उमेरले पनि मेचुएड भईसकेको छ र आत्मनिर्भर पनि छ भने अर्कै कुरा हो । अब कोही मानिस बिहे नै नगरी यत्तिकै बस्छु भन्ला रे, त्यस्तोमा सेक्स रिलेसन नै नराख्ने भन्ने कुरा पनि हुँदैन । उमेर पुगेपछि र आत्मनिर्भर भइसकेपछि त्यो उसको निजी जीवनको व्यक्तिगत निर्णयको कुरा हुन जान्छ ।
तपाईंको सेक्स अनुभव ?
यो नितान्त व्यक्तिगत कुरा हो, यो बारेमा कुरा गर्न चाहन्न ।
 बिहेपछि सेक्स सस्तो लाग्छ रे नि ?
त्यो यस्तो हुन्छ, कुनै पनि कुरा जब एकदम धेरै पाउनुहुन्छ त्यति बेला कहिलेकाहीं यस्तो लाग्न पनि सक्छ । सँगै भएपछि सबै कुरा सेयर हुन्छ । बिहेअगाडि जुन अपेलिङ हुन्छ, त्यो बिहेपछि जिम्मेवारीले थिच्न सक्छ । तर त्यसलाई मायाले बाँधिराख्छ जस्तो लाग्छ ।
कस्तो सेक्स असुरक्षित हुन्छ ?
जब एकअर्काप्रतिको विश्वास सकिन्छ, विश्वासको कमी हुन्छ, त्यहाँनिर सेक्स रिलेसन इन्ड गरेको राम्रो हुन्छ । त्यो अवस्थामा सेक्स रिलेसनलाई रबर तन्काएजस्तो तन्काई राख्नुको कुनै अर्थ रहँदैन ।
फिल्ममा सेक्स जरुरी छ ?
फिल्ममा सेक्स जरुरी छ कि छैन भन्दा पनि यसलाई कसरी देखाउने भन्ने कुरा महत्त्वपूर्ण र जरुरी हुन्छ । एकअर्काप्रतिको मायामोहलाई कसरी पर्दामा देखाउने भन्ने कुराले निर्भर गर्दछ । कि त सेक्सकै बारेमा बनेको फिल्म हुनुपर्‍यो । वसन्ती र गगनसिंहको पनि सेक्सकै कथा हो नि । तर त्यसैमा अहिलेकाले फिल्म बनाए भने कस्तो बनाउलान् ? म त सोच्न पनि सक्दिनँ । किनभने अहिलेको फिल्ममा जस्तो सेक्स देखाइयो भने त्यसले दर्शकलाई आकर्षित होइन, विकर्षित गरिदिन्छ । हाम्रो समाजमा केही कुरा लुकाएकै राम्रो हुन्छ जस्तो लाग्छ ।
परिवार नियोजन कत्तिको आवश्यक छ ?
आवश्यक छ । परिवार नियोजनका साधन बनेकै त्यसकै लागि हो । यी साधन सुरक्षा र स्वास्थ्यका लागि बनाइएको हो । हाम्रो जस्तो समाजमा त परिवार नियोजन झनै जरुरी छ । किनभने हामीकहाँ शहर मात्र होइन, गाउँ पनि छन् ।
प्राकृतिक परिवार नियोजन उपयुक्त कि कृत्रिम ?
खै यो बारेमा त मैले सोचेको छैन । किनभने मेरो लाइफमा मैले कहिले पनि यसको बारेमा सोच्नुपर्ने जरुरी नै भएन ।
पहिलो सन्तानपछि दोस्रो सन्तानको अन्तर कति हुनु ठीक हुन्छ ?
नर्मल डेलिभरी भयो भने दुईदेखि ३ वर्षको अन्तर ठीक हुन्छजस्तो लाग्छ । बच्चा हुर्काउनका लागि पनि यत्तिको अन्तर भएको राम्रो हुन्छ । तर यसमा मेरो अनुभव छैन । मेरो एउटा सन्तान भयो सकियो । मैले जीवनमा जे पाएँ, त्यहीमा हात थापें । त्यो बेलामा काममा बिजी पनि भएँ, त्यसैले अर्को सन्तानका बारेमा कहिल्यै सोच आएन । अहिले त झन् सोचाइ पनि आउँदैन । किनभने जिन्दगी धेरै टढा पुगिसक्यो ।

0 comments

Write Down Your Responses