दसैंको टिकट बुकिङ खुला

काठमाडौं, भाद्र २५ । दसैं मनाउन राजधानीबाट घर जानेहरुका लागि आजदेखि बसको टिकट बुकिङ खुला गरिएको छ । विभिन्न कामका सिलसिलामा राजधानीमा रहेकाहरु दसैंमा घर फर्कने हुँदा हरेक वर्ष दसैं आउनु अघिदेखि नै यात्रुको सुविधाका लागि यातायात व्यवसायीहरुले अग्रिम टिकट बुकिङ गर्दै आएका छन् ।

यात्रुको सुविधाका लागि राजधानीको नयाँ बसपार्क, पुरानो बसपार्क,कलंकी, कोटेश्वर, गौशाला, सुन्धारालगायत १० स्थानबाट टिकट बुकिङको व्यवस्था गरिएको नेपाल यातायात व्यवसायी राष्ट्रिय महासंघले जनाएको छ ।

आजदेखि गण्डकी अञ्चल बाहेकका सबै स्थानमा जाने बसहरुको टिकट बुकिङ खुला भएको जनाइएको हो । गण्डकी अञ्चल जाने बसको टिकट भने आश्विन ५ गतेबाट अग्रिम बुकिङ खुला गरिने जनाइएको छ ।

दसैंमा करिब ३५ लाख मानिस उपत्यकाबाट बाहिरिने अनुमान गरिएको छ । यसमध्ये अधिकांश सडकमार्ग नै भएर जिल्ला जाने गरेका छन् ।

Labels: feature, विषेश