अर्जुन र सोनाक्षी टर्कीको राजधानी इस्तानबुलमा भेटिए

काठमाडौ, आश्विन २४ - यद्यपि कुनै दुई सेलिब्रिटीको निकटतालाई पब्लिसिटी स्टन्ट मान्ने चलन छ । त्यसमाथि वर्तमानमा एकै फिल्म खेल्दै गरेका विपरीतलिंगीबीचको सम्बन्ध त्यही कोटिमा पर्ने सम्भावना प्रबल हुने गर्छ । तैपनि, अर्जुन कपुर र सोनाक्षी सिन्हा यही बाटोमा मात्र नरहेको गाइँगुइँले केही समययता बलिउड नगरी तातिरहेको छ ।

यी दुई पहिलोचोटि एउटै फिल्ममा लिड अपोजिटमा देखिँदै छन् । 'तेवर' को कथालाई दर्शकहरूले कस्तो मान्लान्, त्यो पछिको कुरा, अहिले नै भने त्यो फिल्मका नायक-नायिकाबीच सामान्य मित्रता मात्र नरहेको ठोकुवा गर्नेहरूको संख्या अचानक बढेको छ ।

अहिले प्रेममा रहेका भनिएका अर्जुन र सोनाक्षी यही फिल्मकै सुटिङमा आउन थालेपछि एकअर्कासँग मजाले बोल्न थालेका हुन् । यसअघि त्यस्तो घनिष्ठता थिएन । केही महिनायता उनीहरू छिमेकी मात्रै बनेका छैनन्, छुट्टीको समय पनि साथै बिताउन थालेका छन् ।

हालै उनीहरू टर्कीको राजधानी इस्तानबुलमा भेटिएका थिए । मुम्बईमा एउटा फिल्मको पि्रमियरमा पनि उनीहरू साथै पुगेका थिए । यस्तो भएपछि धूवाँ उड्नु स्वाभाविकै हो ।

अर्जुन र सोनाक्षीको निकटताबारे मिडियामा खबरहरू छाउन थालेपछि दुवैका परिवार र साथीभाइ पनि चनाखो भएका छन् । पहिलो फिल्मबाटै दर्शकमाझ दर्बिलो उपस्थिति जनाएका यी दुवै यसअघिसम्म कसैसँग त्यस्तो रिलेसनसिपमा थिएनन् । अहिले साँच्चै डेटिङमा रहेका भए दुई सिंगल आत्मालाई चैन नै मिल्यो ।

Labels: feature, हिन्दि सिनेमा